Wala pa sang pamilya nga nagclaim sa duha ka matag-as nga opisyal sang New People’s Army nga napatay sa engkwentro batok sa militar sa Sitio Apitong, Brgy Bi-ao, Binalbagan, Negros Occidental kahapon.
Madumduman nga napatay sa engkwentro sanday Komiteng Rehiyon Negros Secretary Reynaldo Elecre alyas Amik, residente sang Bohol, nga pinakamataas nga NPA lider sa Negros Island Region; kasubong man si Regie Pacheco alyas Dante, residente sang Sitio Bulasot, Brgy. Buenavista, Himamaylan City, nga isa sa mga financial logistics officer sang Central Negros 2.
Sa interview sang Bombo Radyo Bacolod kay Police Captain Joelan Vinson, hepe sang Binalbagan Municipal Police Station, ginpanaog na ang mga bangkay kag gindala sa punerarya sa Binalbagan proper agud mas mahapos ma-access sang pamilya.
Mahimo man nga magdangop sa kapulisan ang pamilya sang mga napatay agud sila ang magiyahan kag maclaim ang lawas sang ila himata.
