Magapangatubang sang kaso nga homicide ang duha ka persona nga gin-aresto matapos mapatay ang ila ginkastigo sa Purok Marapara, Brgy. Bata, Bacolod City sang Abril 21.
Ang biktima ang ginkilala kay Jude, 22 anyos, single, wala sang trabaho kag residente sang Zone 1 Purok Marapara, Brgy. Bata, Bacolod City.
Samtang ang mga suspek ang ginkilala nga sanday Jessa, 24 anyos kag Daven, 17 anyos kag lunsay mga residente sang nasambit nga lugar.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, nagresponde ang mga kapulisan matapos makabaton sang report sang mauling incident nga nagluntad sa Purok Marapara, Brgy. Bata, Bacolod City.
Suno kay Tapang, ginakasubo sang mga ini nga napatay ang biktima matapos nga gindala sa hospital.
Suno sa station commander nadakpan ang duha kag magapangatubang sang kaso nga homicide bangud wala man ang mga ini sang intention nga patyon ang biktima.
Ang kinagamo ang nag-ugat sa alegasyon sang suspek nga ginkawat ang mga bayo sang mga ini.
Santo sa nakuha nga impormasyon sang mga kapulisan ang isa sa mga suspek ang gina-alegar nga naggamit sang pitchakorno nga mahimo rason nga natam-an ang biktima kag nagresulta sa kamatayon sini.
Pilas sa liog kag tingkoy ang naagom sang biktima.
