Patay ang duha ka mga sakay sang tricycle matapos nga matumbahan sang puno sang lubi sa Sitio Nasipit barangay Cabangahan, Siaton Negros Oriental sang Disyembre 24 sang hapon.
Sa interview sang Bombo Radyo Bacolod kay Police Chief Master Sergeant Sherwin Laino, investigator sang Siaton Municipal Police Station, may nagtawag sa police station agud nga magpahibalo nga may naaksidente nga tricycle kun sa diin gilayon man nila nga ginrespondehan.
Suno kay Laino, nagasakay ang 11 ka mga pasahero sa tricycle halin sa banwa sang Valencia apang pag-abot sang mga ini sa nasambit nga lugar, natumba ang puno sang lubi nga gintunaan nga maaksidente ang tricycle.
Suno diri, duha sa 11 ka mga pasahero sang tricycle ang gindeklarar nga dead on arrival sa hospital nga ginalakipan sang apat ka tuig nga bata nga lalaki kag isa ka 40 anyos nga babayi samtang ang walo ang gindala man sa ospital agud nga madapatan sang nagakaigo nga pagbulong samtang ang isa mga pasahero ang wala nasamaran.
