Duha ka Pilipino ang ginbawian sang kabuhi kahapon sang nagtakilid sa isa ka motorway ang ginsakyan nga bus nga magadul-ong kun tani sa ila sa Oktoberfest beer festival sa nabagatnan nga bahin sang Germany, santo sa mga otoridad.
Walo naman ka iban pa ang pilason matapos ang insidente.
Ang coach, nga nag-arkila pa sa isa ka kompanya, ang may sakay nga grupo sang kapin 50 ka mga turista nga Pilipino padulong sa Oktoberfest sa Munich, santo sa kapulisan.
Gin-deploy ang masobra 250 ka emergency resources sa lugar sang insidente.
Ginsirado naman ang motorway sa magkatuhay nga direksyon.
Nagpagwa naman sang pahayag ang Philippine Consulate General sa Frankfurt sa diin ginkasubo sini ang aksidente nga may close contact sa German police kag sa kaangoy nga mga otoridad.
Base sa initial nga imbestigasyon, naggwa sa kalsada ang bus antes ini nag-overturn malapit sa Buchloe, sa isa ka rehiyon nga malapit sa Austrian border.
Naggikan ang salakyan sa Mailand.
Suno sa Frankfurt consulate, gina-verify pa nila ang identity sang mga biktima.
Nagpalab-ot naman sang pagpakig-unong si Philippine Consul General sa Milan nga si Jim Tito San Agustin sa pamilya sang mga naapektohan paagi sa social media post.
Ginpahayag sini nga padayon ang ila pagpakig-angot sa Philippine Consulate General in Frankfurt.
