Nakilala na ang duha ka mga rebelde nga napatay sa engkwentro sa tunga sang militar kag New Peoples Army sa Hacienda Paraiso, Brgy Caduha-an, Cadiz City kahapon sang kaagahon.
Ang napatay ang ginkilala kanday Hans Ponteras Alyas JOJO/LANCE/TEDDY/MOJO kag nagapungko nga Regional Front Secretary kag Finance Officer kag pinuno sang Regional Taxation Implementing Group sang Komiteng Rehiyon-Negros,Cebu,Bohol,Siquijor (KR-NCBS) kag Marisa Pobresa alyas KIM/RENZ/MIA kag Regional Communication Officer, sang nasambit nga grupo.
Sa interview sang Bombo Radyo Bacolod kay Lt Col Arnel Calaoagan, Battalion Commander sang 79th Infantry Battalion sang Philippine Army, ang duha ang nadala na sa punerarya kag ang bangkay ni alyas Kim ang nakuha na sang pamilya samtang si Alyas Jojo ang nagapabilin sa punerarya.
Narecober sa encounter site amo ang isa ka M16 rifle; isa ka caliber .45 pistol; isa ka laptop; isa ka backpack nga may personal belongings; sling bag; hand grenade; lima ka 40 mm high explosive grenades; isa ka rifle ; isa ka short magazine para sa M16 rifle kag duha ka magazine para sa caliber .45 pistol.
Dugang man sa recoveries ang mga subersibo nga dokyumento kag extortion.
Suno kay Calaoagan, ang babayi nga napatay ang 23 anyos pa lamang gani menor de edad pa lang ini nga ginrecruit sang makawala nga grupo.
Suno diri, ini ang nagapamatuod nga ang nasambit nga armado nga grupo ang wala sang respeto sa bwas-damlag sang mga kabataan kag maathag nga paglapas sa Child abuse law, Child Protection in arm conflict kag human rights nga masami sang mga ini nga ginarason batok sa legitimate operations sang mga militar.
Ginpahayag man ni Calaoagan nga si alyas Jojo ang madamo sang pending warrants.
Nahibaluan nga nagdangat sa pito ang naka-engkwentro sang Philippine Army kun sa diin naglawig sang pito tubtob walo ka minutos ang pagbayluhanay sang lupok.
Ginalantaw man nga ang naka-engkwentro ang mga remnants sang dismantled Northern Negros Front nga naka-engkwentro man sang militar sang Pebrero.
Padayon nga ginaengganyo sang Philippine Army ang mga nabilin nga katapo sang NPA nga magsungka na kag magbalik sa sabak sang gobyerno agud nga makabenepisyo sa reintegration kag amnesty programs.
