Masobra P13 million ang balor sang suspected shabu nga narecover gikan sa duha ka residente sang Iloilo sa drug buybust operation nga ginpatigayon Hacienda Sta. Ana, Barangay Palampas, San Carlos City, Negros Occidental kahapon sang hapon.
Sa interview sang Bombo Radyo Bacolod kay Police Lt. Col. Jesus Mesahon, hepe sang San Carlos City Police Station, ang mga suspetsado ang ginkilala nga sanday John Valentin Remegio, 34 anyos, high value individual, residente sa Barangay Caingin, Lapaz, Iloilo kag Crismark Blancaflor, 27 anyos, high value individual, residente sa Barangay Poblacion sa Bingawan, Iloilo.
Narecover sa duha ang tatlo ka heat sealed transparent plastic sachet sang suspected shabu bilang buybust item, dugang nga duha ka vacuum sealed transparent plastic sachet sang suspected shabu nga yara sa paghinakop sang suspetsado, brown paper bag, itom nga sling bag, eco bag, duha ka packaging tape, isa ka unit sang shevrolet nga salakyan kag P10,000 nga buybust money.
Ang suspected shabu ang nagabug-at sang 2,015.25 grams kag nagabalor sang P13,703,000.
Suno kay Mesahon, ginpatigayon ang operasyon alas-2:57 sang hapon sa maligwin nga bahin sa likod sang San Carlos City District Hospital amo ang pinakadako nga narecover nga droga sang San Carlos City Police Office subong nga tuig.
Pahayag sang hepe nga P10,000 lamang ang gamit nga buybust money, apang nakibot sila sang ini ang ginkuha sang mga suspetsado gikan sa suludlan sang bulto sang suspected shabu.
Nakita man sa nakumpiskar nga salakyan ang mga resibo sa BREDCO port kasubong man sa ila wallet nga nagapakita nga sila ang nagtabok gikan sa Iloilo.
Ang suspected shabu ang gindala sa crime lab sang Negros Occidental Police Provincial Office (NOCPPO) samtang ginpaidalum man sa drug test ang duha ka suspetsado.
Ginalauman ni Mesahon nga sa paggwa sang resulta sa crime lab, gilayon man nga mafile ang nagakaigo nga kaso batok sa duha ka suspetsado subong nga adlaw.
