Pilason ang apat ka mga indibidwal nga ginalakipan sang duha ka mga suldado, isa ka Citizen Armed Force Geographical Unit (CAFGU) kag isa ka sibilyan sa nagluntad nga engkwentro sa tunga sang 94 Infantry Batallion sang Philippine Army kag makawala nga grupo sa Sitio Bulad, Brgy Karabalan, ciudad sang Himamaylan, alas-8:00 sang Sabado sang gab-i.
Sa interview sang Bombo Radyo kay 2Lt Arhen Li Reblando, Civil Military Officer sang 94IB sang Philippine Army, samtang nagpatigayon sang security and military patrols ang pito ka mga gindeploy nga Mobile Community Support and Sustainment Program (MCSSP) team sa area, hinali lang nga nagpalupok ang mga makawala nga grupo.
Naglawig sa 10 minutos ang engwentro.
Ginabanta lima ka mga gina-alegar remnanat sang Central Negros Front ang na-engkwentro sang tropa.
Ang duha ka mga suldado ang nakaagom sang minor injury sa ila dalunggan kag tudlo samtang ang isa ka CAFGU ang napilasan sa tiyan nga bahin sang iya lawas.
Samtang, suno kay Reblando, gina-verify pa nila kun diin nga bahin sang lawas nasamaran ang isa ka sibilyan.
Suno kay Reblando, may gindeploy na nga mga personnel sa area para sa pursuit operation agud makumpirmar kun may napilasan sa bahin sang rebelde nga grupo.
Ginakondenar sini ang kaangay nga insidente ilabi na nga mabutang sa katalagman ang kaluwasan sang mga pumuluyo.
Sa pihak sini, ginpasiguro ni Reblando nga paghatag sang serbisyo sang mga pumuluyo.
