Wala nagpa-areglo ang duha ka mga tigulang nga nagviral matapos nga gingan-it sang magnobyohanay sa ciudad sang La Carlota, Negros Occidental.
Sa interview sang Bombo Radyo Bacolod kay Punong Barangay Anabelle Bermudo sang Barangay 3, La Carlota City, nag-atubangay na sa barangay kahapon sang hapon ang mag-asawa nga tigulang kag ang magnobyohanay.
Suno kay Bermudo, wala nagpa-areglo ang mag-asawa apisar nga nagpangayo man sang pasaylo ang magnobyohanay.
Suno diri, gin-ako man sang babayi nga naggan-it sa tigulang nga nakainom man gid ang mga ini kag may nabatian siya nga tinaga nga ginhambal sang tigulang nga babayi nga wala niya magustuhan gani gin-umol man ini.
Suno sa punong barangay ginpaintsindi niya man sa duha nga indi maayo ang ginhimo nila sa mga tigulang.
Wala naman mahimo ang punong barangay sa indi pagpaareglo sang duha ka mga tigulang.
Ginpahayag man sini nga magaatubangay pa ang duha ka tigulang kag magnobyohanay sa madason nga semana antes ang mga ini maghatag sang certificate to file action.
Samtang ginkumpirmar sang kamagulangan nga bata sang duha ka mga tigulang nga wala nagpa-areglo ang ila mga ginikanan bangud indi maayo ang ginhimo sa ila.
Suno kay Emmanuel Zamudio, wala nagpasettle ang iya mga ginikanan kasunod sang pag-atubangay sang mga ini kahapon sang hapon.
Suno kay Zamudio nagpangayo ang mga ini sang pasensya sa iya mga ginikanan apang wala gid sang tsansa nga magpaareglo ang mga ini.
Suno diri, sila nga pito ka mag-utod ang nagduso sa ila mga ginikanan nga magpasaka sang kaso batok sa duha bangud wala sika nanamian sa natabo sa ila ginikanan.
Pakaduha sang mga ini ang babayi kag indi naman sang mga ini paryente ang lalaki.
Ginpahayag man sini nga dayunon gid nila ang kaso bangud ini man ang gin-advise sa ila sang alkalde agud nga mahatagan ang mga ini sang leksyon bangud nahimo sang mga ini sa ila ginikanan, indi man malayo nga mahimo man nila sa iban.
