Padayon pa ang imbestigasyon sang kapulisan agud matumod kun sin-o ang gin-utdan sang duha ka tiil nga ginbilin sa kilid sang isa ka commercial establishment sa CL Montelibano Avenue, Barangay Villamonte, Bacolod City kaina sang kaagahon.
Sa interview sang Bombo Radyo Bacolod kay Police Cap. Greeky Cayao, station commander sang Bacolod Police Station 4, nakaputos ang duha ka tiil sa transparent nga plastic.
Sa sulod sang plastic may yara sang papel nga may nakasulat nga wala pa ginpagwa sang mga kapulisan.
Suno sa mga trabahador nga nakakita sang plastic, naglabay ang isa ka motorsiklo sa area ala-1:00 sang kaagahon kag ila nakita ang plastic gani ila ini gintsekyar.
Sa karun, indi pa mahambal sang kapulisan kun babayi ukon lalaki ang gin-utdan sang tiil ukon buhi pa ukon patay na ang biktima.
Suno kay Cayao, posible nga kagab-i gin-utod ang tiil bangod nga may dugo pa ini apang wala sang may nagpalapit sa police station nga nagreport nga namissing nga pamilya.
Ginapatihan man nga sa lain nga lugar gin- utod ang tiil bangod nga motorsiklo lang ang nakalabay sa area.
Nagapanawagan si Cayao sa kun sin-o man ang may himata nga namissing ukon gin-abduct nga makig-angot sa ila nga estasyon agud madala ini sa punerarya.
