Gilayon nga gin-usisa sang Bacolod Traffic Authority Office ang duha ka mga traffic enforcers nga nagsumbaganay sa intersection sang dalan Rizal kaina.
Ang mga traffic enforcers nga naga-apelyido Ayuban kag Biñas ang nagsumbaganay alas 9:45 kaina sang aga.
Sa interview sang Bombo Radyo kay BTAO Head Police Lieutenant Colonel Luisito Acebuche, ginpahayag sini nga nagapadayon ang ila nga imbestigasyon sa rason kun ngaa nagsumbaganay ang duha ka traffic enforcers nga nahibaluan nga mag-abyanay.
Suno sa iya, papanaugan ang mga ini sang suspension bangud bilang isa ka enforcer suno sa BTAO head, kinahanglan nila sang disiplina.
Nagpahanumdom man ini sa mga traffic enforcers nga ubrahon sang husto ang ila responsibilidad kag indi magpadala sa emosyon.
Gindugang man sini nga sa karun, may yara sang 397 ka mga enforcers sa ciudad kag nagrequest ini nga magdugang sang pwersa agud malab-ot sang 500 bangud madamo sang mga palaabuton nga festivals sa Bacolod.
