Nafile na kahapon sang bakeshop chain ang kaso nga qualified theft batok sa apat ka mga suspetsado nga imbulbado sa hijack me incident agud makawat ang 1,000 ka sako nga kalamay nga gin-order gikan sa BISCOM Sugar Central sa banwa sang Binalbagan.
Sa interview sang Bombo Radyo Bacolod kay Police Lt. Col. Jay Malong, hepe sang Bago City Police Station, ang apat ka mga suspetsado nga ginalakipan sang mga drivers sa duha ka wingvan nga ginkilala kanday Michael Orquin sang Cadiz City kag Jhujiet Arsenio sang Barangay Dapitan, Pototan, Iloilo kasubong man ang gwardiya sa warehouse nga gindagdagan sang kalamay sa Purok Malipayon, Barangay Busay, Bago City nga si Boy Salmayor kasubong man si Poloy Veraguas nga amo ang nagpanawag sang mga tawo agud magdiskarga sang kalamay sa bodega.
Paathag sang hepe nga sa dalagan sang ila imbestigasyon, wala na sang iban nga suspetsado ukon john does sa krimen magluwas sa apat nga nadakpan.
Madumduman nga nagpakunokuno ang duha ka drivers nga sila ang ginhijack sang Lunes sang gab-i sa syudad sang La Carlota kun sa diin sila ang ginbilin kaupod sa ila nga salakyan sa banwa sang Murcia nga nakagapos kag may piring sa mata tubtob sila ang narescue sang Martes.
Apang sa imbestigasyon, nagtuad si Orquin nga sila ang nagkawat sang kalamay kag gintago sa bodega sa syudad sang Bago.
Apang sa pagtsekyar sang mga kapulisan, kulang sang 35 ka sako sang kalamay ang yara sa warehouse, samtang nagapanindugan naman ang mga imbulbado nga didto lamang nila gindiskarga ang mga kalamay.
Madumduman nga sa pagtsekyar sang GPS sa salakyan, matapos nga makahalin sa Sugar Central sa banwa sang Binalbagan, ang mga wing van ang nagpondo pa sang anom ka oras sa Pontevedra, nga nahibaluan nga amo man ang address ni Salmayor.
Samtang antes pa ang pagdiskarga sang mga kalamay sa bodega, ang duha ka wing van ang nakita man sang mga residente nga nakapark sa atubang sang Sand and Gravel nga negosyo ni Veraguas.
Ang kaso batok sa apat ang yara na sa kamot sang Bago City Prosecutors Office.
