Kumpirmado nga positibo sa African Swine Fever ang duha nagikan sa tatlo ka mga baboy sa Barangay Taculing, ciudad sang Bacolod nga ginkuhaan sang specimen agud ipaidalom sa laboratory test matapos nga napatay sang tinalikdan nga semana.
Santo sa ginpagwa nga resulta sang confirmatory test nga ginpatigayon sang Bureau of Animal Industry, positibo sa ASF ang mga baboy nga ginkuha sa ciudad sang Bago bilang kabahin sang proyekto sang youth sang Barangay Taculing.
Sa interview sang Bombo Radyo kay Vice Mayor El Cid Familiaran nga amo sa karon ang acting mayor sang Bacolod, nakita na niya ang resulta nga ginpagwa sang Bureau of Animal Industry.
Bilang acting mayor, nagsapol sila kahapon sa African Swine Fever Task Force nga nagahimo naman sang mga tikang agud nga mapunggan ang paglapta sang balatian diri sa ciudad.
Sa iya nga personal nga paglantaw, pagakabigon ni Familiaran nga alarming ang nasambit nga balatian.
Wala sapayan sang balatian, nagapati si Familiaran nga dapat kabigon nga ASF ang anuman nga kamatayon sang baboy, bisan bangud ini sa cholera ukon pneumonia, agud nga makondisyon ang pinsar sang tawo nga mahimo sang tikang nga mapunggan ang paglapta sang balatian.
Sa Biyernes, magapatigayon sang seminar sa mga tiglawas sang mga barangay nga himuon nga paravets nga magabulig sa mga veterinarian agud nga sila ang maga-educate sa mga hog raisers kag mga pumuluyo agud nga mapunggan ang paglapta sang ASF.
Ginpalab-ot naman sini sa mga hog raisers nga wala sang bulong para sa ASF kundi igapatuman ang biosecurity kaangay sang disinfection sang lugar, vaccination kag husto nga paghaboy sang disposable injections agud nga indi magtinir diri ang virus nga nagadala sang balatian.
