Desidido ang pamilya sang duha ka persona nga ginluthang-patay sang isa ka CAFGU Active Auxiliary (CAA) member sa Barangay Montilla, sa banwa sang Moises Padilla kahapon sang hapon.
Ang insidente ang nagluntad alas-4:30 kahapon sang hapon, apang nareport sa Moises Padilla Municipal Police Station alas-6:55 na sang gab-i.
Ang mga biktima nga napatay amo ang mag-amay nga sanday Godofredo Templatura, 70 anyos kag John Albert Templatura, 32 anyos; samtang pilason naman ang duha ka babayi nga nasalabat nga ginkilala nga sanday Marites Rafol, 49 anyos kag Jeisel Abaño, 34 anyos nga isa ka loan officer sa isa ka bangko.
Ang suspetsado ang ginkilala naman nga si CAA Donan Sosia, 32 anyos residente sa Barangay Macagahay sa nasambitan nga banwa.
Sa interview sang Bombo Radyo Bacolod kay Police Major Joevito Bose, hepe sa Moises Padilla Municipal Police Station, nagreport sa CAA detachment ang Punong Barangay sa lugar bangod sa gina-alegar pagmaoy sang mga hubog apang sa una nga pagresponder nagpalagyo ang mga ginareklamo.
Apang sa paghalin sang mga CAFGU, nagbalik man ang mga ini tubtob sa liwat nga nagmaoy si John Albert nga amo ang may kaadlawan, kun sa diin kaaway naman sini ang iya nga bayaw.
Sa liwat nga pagreport, nagaisahanon lamang nga nagresponder si Sosia, kag sila ang may inisyal pa nga diskusyon ni John Albert.
Apang hinali lamang nga naghunos sang binangon ang may kaadlawan kag naghana nga solungon ang CAFGU member.
Bangod sini ginpaarakan ni Sosia sang luthang sa lawas ang biktima gamit ang iya service firearms nga M16 rifle.
Sa pagkatumba ni John Albert, nagpalapit man sa CAFGU ang amay sang biktima, kag ini ang iya man hinali nga ginpaarakan sa lawas.
Sa statement sang mga nakakita kasubong man sa footage sa nasambitan nga insident, makita nga wala sang ano man nga armas ang tatay kag ini ang nagalakat lamang sang gintiro sang CAFGU.
Samtang nasalabat naman sa paa sanday Rafol kag Abaño nga gilayon nga gindala sa ospital para sa pagpabulong.
Gindala pa sang CAFGU ang binangon padulong sa ila detachment matapos ang krimen.
Para kay Bose, indi makabig self defense ang natabo bangod lunsay lawas ang gilayon nga gintiro sang suspetsado kag long firearms pa ang gamit sini.
Apang nakadepende naman sa piskal kun ano ang paglantaw sini sa hitabo.
Dugang pa ni Bose nga wala nagsungka si Sosia kundi ini ang ila nadakpan sa ila nga detachment.
Magluwas sa pamilya sang mga napatay, mahimo man nga makapasaka sang kaso ang mga nasalabat sa insidente kag ginpasalig sini nga sila sa kapulisan ang magapangita sa pinakamataas nga mahimo mapasaka nga kaso.
