Duha ang patay samtang isa ang pilason matapos nga nagbungguanay ang truck kag motorsiklo sa Hda. San Jose, Barangay Mabini, syudad sang Cadiz.
Sa interview sang Bombo Radyo Bacolod kay Police Lt. Col. Gil John Despi, hepe sang Cadiz City Police Station, dead on the spot ang 11 anyos nga lalaki samtang napatay naman sang ginabulong sa ospital ang upod sini nga 16 anyos.
Ang mga biktima ang lunsay mga residente sang Barangay Tinampaan sa nasambit nga syudad.
Suno kay Despi, nakaluwas naman ang 13 anyos nga driver sang motorsiklo.
Suno sa hepe, nagabiyahe sa pareho nga direksyon ang motorsiklo kag ang truck nga kargado sang tubo nga ginamaneho ni Bertito Montenola, 55 anyos kag residente sang Barangay Mabini, Cadiz City.
Suno kay Despi, magapauli na sa Barangay Tinampaan ang tatlo nga naga-angkasanay sa motorsiklo bangud may ginkuha ang mga ini nga paho sa ila nga balay, sang mag overtake ang motorsiklo sa truck kun sa diin nadisgasya kag nagsuhot ang motorsiklo sa idalum sang salakyan.
Halos wasak ang ulo sang 11 anyos nga lalaki samtang ang 16 anyos naman ang nadala pa sa ospital apang ginbawian sang kabuhi samtang ginabulong.
Ginpahayag man ni Despi nga may yara man sang sala ang mga ginikanan sang mga biktima bangud ginpasugtan ang mga kabataan nga magdala sang motorsiklo.
May yara naman sang pag-aregluhanay sa tunga sang pamilya sang mga biktima kag sa driver sang truck.
