Duha ang patay samtang isa naman ang pilason sa nagluntad nga pagpamuno sa Sitio Binasagan, Barangay Macasilao banwa sang Calatrava kahapon sang kaagahon.
Ginkilala ang mga napatay kanday Mayo Lumanog, 30-anyos; Sergio Cabriana, 31-anyos samtang pilason naman ang barangay tanod nga nagtambag nga ginkilala kay John Bacoli, 54-anyos.
Sa interview sang Bombo Radyo Bacolod kay P/Major Roberto Indiape, hepe sang Calatrava Municipal Police Station, nagagwa sa ila imbestigasyon nga nagikan ang mga biktima kag suspetsado sa isa ka pre-wedding blow out party sang hinali lang nagmaoy kag nanghangkat sang away si Antonio Dumalag Jr., 31-anyos.
Gilayon nga ginsumbag ini ni Lumanog kag nagbulig man sa pagsumbag si Cabriana apang nabun-an sini ang ikaduha nga biktima.
Suno kay Indiape, ginpahayag sang suspetsado nga si Cabriana lang ang iya nabun-an kag may isa pa ka suspetsado ang nagbuno naman kay Lumanog.
Gintuyo naman nga pauntaton sang barangay tanod nga si Bacoli ang mga ini, apang nabun-an man ni Dumalag.
Ma-swerte naman nga wala ini naka-angkon sang patal nga pilas.
Gilayon nga gindala ang mga biktima sa ospital apang gindeklarar nga patay sanday Lumanog kag Cabriana.
Sa karon suno kay Indiape padayon pa ang ila imbestigasyon sa insidente agud matumod na ang isa pa ka suspetsado nga nagbuno-patay kay Lumanog.
Priso naman si Dumalag sa Calatrava Municipal Police Station para sa nagakaigo nga disposisyon.
