BACOLOD CITY – Patay ang duha katawo lakip na isa ka menor de edad sa aksidente sa national highway sang Purok 3, Barangay Man-uling, Cauayan, Negros Occidental las-10:20 kagab-i.
Dead on arrival sa Cauayan District Hospital sanday Emmanuel Sabo, 40-anyos, kag himata sini nga si Christine Jade Garcenilla, 9-anyos bangud sa kapilasan nga ila gin-agom matapos ginbungguan sang nagahagunos nga public utility jeepney (PUJ) ang ginasakyan nila nga traysikol.
Pilason naman ang driver sang traysikol nga si Sherwin Garcenilla, 37-anyos kag amay sang bata nga napatay. Subong man sanday Judia Patricia Garcenilla, 12-anyos kag John Marvin Garcenilla, 7-anyos.
Ginpahayag nga gikan sa balay sang ila tiyo sa Cauayan ang mga biktima kag magapauli na kuntani sa Barangay Goce, banwa sang Ilog sang hinali nga ginbungguan sang PUJ nga ginamaneho ni Efren Cuenca, 43-anyos, kasado, pumuluyo sang Sitio Tabuc Suba, Barangay Poblacion, Cauayan.
Gindusdos sang PUJ ang traysikol sang kapin 60 metros antes nakadulog.
Ginapatihan hubog si Cuenca sang matabo ang aksidente.
Wala makaluwas sa kamatayon ang mga biktima bangud nabilin ang mga ini sa traysikol samtang ang iban nga kaupod ang nakalumpat.
