Patay ang duha ka mga persona matapos nabungguan sang isa ka truck sang tubo ang ila ginasakyan nga motorsiklo sa Barangay Cubay, La Carlota City pasado alas 4:00 sang hapon kahapon.
Sa impormasyon nga nakuha sang Bombo Radyo, nagabyahe nagikan sa ciudad sakay sa motorsiklo sanday Jervin Manansala, 16 anyos, nga amu ang nagamaneho kag angkas sini nga si Angelica Manansala, lunsay mga residente sang Purok 17, Barangay La Granja, La Carlota City kag papauli na kuntani sa ila puluy-an.
Sang sila ang nagliko sa dalan, hinali lang nga nabungguan ang mga ini sang isa ka 10 wheeler truck sang tubo nga ginamaneho ni Lino Labrador, 34 anyos, residente sang Sagay City.
Bangud sa kakusog sang impact, wala na natabangan ang mga biktima kag gindeklarar nga dead on arrival sa ospital.
Sa karun nakahunong si Labrador sa La Carlota City Police Station para sa proper disposition.
