Patay ang duha ka mga lalaki matapos nga nagsuhot ang ila ginasakyan nga motorsiklo sa isa ka truck sa banwa sang Binalbagan kaina sang aga.
Ginkilala ang mga napatay kag mag-abyan nga sanday Eddie Jormanero, 38-anyos kag Paceo Jimenez, 36, nga lunsay residente sang Sitio Kabanbanan, Brgy. Libacao, Himamaylan City.
Suno sa imbestigasyon sang Binalbagan Municipal Police Station sa pagpamuno sang hepe nga si Police Major Fernando Somblingo, nagapamyesta sa Brgy. Enclaro, Binalbagan ang duha kag papauli na ang mga ini sang nagluntad ang aksidente sa antes sang taytay sa Brgy. Paglaom mga alas-6:45 kaina sang aga.
Santo sa imbestigasyon, gin-agaw sang motorsiklo ang linya sang truck nga ginamaneho ni Joy Vallente, 46, sang Mambagaton, Himamaylan, rason nga nag head-on collission ang duha ka mga salakyan kag nagsuhot sa idalom sang truck si Jormanero samtang naglabog naman si Jimenez.
Gikan sa Binalbagan Isabela Sugar Company (BISCOM) ang truck kag may karga nga mud press kag gina-usoy sini ang pa-norte nga direksyon sang nagbunggo ang motorsiklo nga pa-sur.
Priso karun ang driver sang truck sa Binalbagan Municipal Police Station kag ginahulat ang pamilya sang mga biktima kun handa ang mga ini nga magpasaka sang kaso nga reckless imprudcence resulting to multiple homicide ukon mapa-areglo na lang.
