Patay ang 52 anyos nga mangunguma matapos matrap sa nagakasunog nga kampo sa Sitio Salay, Barangay Tan-awan, Kabankalan City, Negros Occidental, kahapon sang hapon.
Ang biktima ang ginkilala nga si Pepito Millada, residente sang nasambit nga lugar.
Sa interview sang Bombo Radyo Bacolod kay Police Captain Sammy Gasataya, deputy chief of police sang Kabankalan City Police Station, gintutdan ni Millada ang kampo apang sa paglapta sang kalayo, wala sini mahimo nga makagwa.
Suno diri, ginalantaw nga nasuffocate si Millada kag nalipongan kun sa diin nasunog ini sa tunga sang kampo.
Ginkatingala naman sang pamilya kun ngaa wala ini nakapauli kag sang ila pagpangita, nakita sang manghod sang biktima ang bangkay ni Millada.
Samtang, patay man ang 68 anyos nga lalaki matapos matrap sa kampo samtang nagapanutod sang kansiyaha sang tubo sa Sitio Omelis, Barangay Poblacion, Cauayan, Negros Occidental.
Ang biktima ang ginkilala nga si Alyas Eleno, residente sa Purok 4, Brgy Man-uling, Cauayan.
Sa impormasyon nga natipon sang Bombo News Team, si Eleno ang nagtutod sang kansiyaha sang tubo kapin alas-11:00 sang aga, apang gintinguhaan sini nga mapunggan ang pagtabok sang kalayo sa pihak nga kampo.
Apang siya ang natrap nga nagresulta sa pagkasuffocate sang senior citizen.
Gindala pa ini sa ospital apang gindeklarar nga dead on arrival.
