Duha ang patay sa nagluntad nga pagbaha sa banwa sang Bindoy, Negros Oriental kahapon.
Sa interview sang Bombo Radyo Bacolod kay Engineer Wilfur Herrera, Jr., pinuno sang Local Disaster Risk Reduction and Management Office sa banwa sang Bindoy, patay ang 68 anyos nga lalaki nga ginkilala kay Nildo Andalahaw, nga isa man ka person with disability kag ang 18 anyos nga si Albie Babor nga nauna nga reported nga namissing bangud sa nagluntad nga pagbaha.
Suno diri, ang 18 anyos ang napatay ang una nga namissing matapos malunod sa suba nga ginpaliguan sang mga ini bangud man sa nagluntad nga daludo.
Suno kay Herrera Jr., nagluntad ang pagbaha mga alas 4:00 ang takna kahapon kun sa diin nagdangat sa dughan ang tubig kag madasig man nga nagsaka ang tubig bangud sa high tide.
Suno diri, ang mga apektado nga lugar amo ang inner sang Barangay Cabugan kag pila ka portion sang Barangay Poblacion.
Nagdangat naman sa 51 ka pamilya ukon 182 individuals ang nag-evacuate bangud sa pagbaha apang ang pinakamadamo nga apektado ang nagikan sa Barangay Cabugan nga nagdangat sa 35 ka pamilya.
Ang mga evacuees ang nakabalik naman sa ila tagsa ka mga puluy-an.
Magluwas sa casualties, totally damage naman ang footbridge sa inner Cabugan, Escalon, kag sa Canipa-an samtang may apektado man nga flood controls.
