Patay ang duha ka lalaki nga nagabyahe sakay sa motorsiklo sa national highway sa crossing Biaren sa Barangay Manalad sa banwa sang Ilog, sang Miyerkules sang gab-i.
Sa interview sang Bombo Radyo kay PMaj. Randy Babor, hepe sang Ilog Municipal Police Station, nagabyahe si Jonel Dano-og, 29-anyos, residente sang nasambit nga banwa, halin sa sur padulong sa norte nga dereksyon kun sa diin nag-overtake ini sa ginasundan niya nga salakyan apang naglapaw na ini sa pihak nga lane.
Nasugata sini ang motorsiklo nga ginamaneho ni Vincent Toledo, 26-anyos, nga isa ka SK chairman kag manunudlo, nga residente sang barangay Yao-yao, Cauayan nga nagresulta sa head on collision.
Gindala sa ospital ang duha apang gindeklarar nga dead on arrival si Toledo samtang ginbawian man sang kabuhi si Dano-og pakasunod nga adlaw.
Pahayag ni Babor, masanag man ang lugar kag malapad ang dalan apang madasig ang pagpadalagan sang duha.
