Duha ang pilason sa nagluntad nga shooting incident sa Rizal Street, Barangay 26, Bacolod City alas 12:30 sang kaina sang kaagahon.
Sa interview sang Bombo Radyo kay Police Major Ritchee Gohee, station commander sang Bacolod Police Station 4, madugay na nga nagapangimon si Richard Jimenez kay Police Master Sergeant Jeff Disucatan, desk officer sang Bacolod Police Station 2, bangud abyan sang pulis ang ex-girlfriend sini.
Suno kay Gohee, kaina sang kaagahon may nagluntad nga komprontasyon sa duha kag napuno na si Disucatan gani siya ang nagpalupok sang makatatlo ka beses.
Imbes nga magpalagyo, nagkuha sang botelya si Jimenez kag naghana pa nga magbato gani liwat nga naglupok ang pulis apang sa ikalima sini nga pagpalupok, iya na gintuon ang armas luthang sa biktima kag naigo ini sa tiil.
Nasalabat naman si Jorem Sibug, nga nagalakat lamang papauli kuntani sa Barangay 27, Bacolod City kag naigo sa tiyan.
Sa karun yara sa ospital ang duha ka mga biktima.
Nagpalagyo kag nanago sa isa ka balay sa Barangay 26 si Disucatan apang gilayon man nga nagsungka pasado ala 1:00 sang kaagahon kag ginsurrender man ang iya 9mm nga issued firearm nga gingamit sini sa pagpangluthang.
Sa karun yara si Disucatan sa kustodiya sang Bacolod Police Station 4 kag natalana nga magpangatubang sang kaso.
