Pilason ang isa ka pedestrian kag backrider sang motorsiklo nga nakabunggo diri matapos nagluntad ang aksidente malapit sa ospital sa dalan Araneta sa bahin sang Barangay Pahanocoy, Bacolod City kahapon.
Ang iloy nga nagatabok nga nasamaran ang ginkilala kay alias “Ruth”, iloy, 40-anyos, samtang luwas naman sa katalagman ang bata sini nga menor de edad, nga pareho residente sa nasambit nga Barangay.
Samtang ang pilason nga backrider amo si alias “Jo”, 20-anyos, kag ang driver sang motorsiklo ang ginkilala nga si alias “Chris”, 20-anyos, nga pareho residente sang Brgy. Tangub.
Sa Police Report gina-alegar nga madasig ang pagpadalagan sang motorsiklo nga naga-usoy sa direksyon nga sur padulong norte, sang aksidente nga nabungguan sini ang iloy nga nagatabok upod ang iya bata padulong sa east nga direksyon.
Nakaagom sang pilas ang iloy kag ang backrider ni Chris sa amo nga aksidente.
Suno kay Police Executive Master Sergeant Rodney Tiania, Deputy Head sang Bacolod City Police Office-Traffic Enforcement Unit, naglabog pa ang motorsiklo kag naiguan sini ang modernized jeep kag tricycle nga yara sa amo nga dalan.
