Duha ang pilason matapos nga nabungguan sang service sang isa ka punerarya ang isa ka motorsiklo sa National Highway sa atubang sang BNL Cockpit, Brgy. Zone 16, Talisay City, Negros Occidental, kahapon sang hapon.
Nagasakay sa motorsiklo sanday Romy Pateño Caigas Jr. 35 anyos, single, kag si Jonel Landisa, 32 anyos, single, lunsay mga residente sang Purok Mabinuligay, Brgy. Bata, Bacolod City.
Samtang ang Cadillac Fleetwood Funeral Hearse sang Rolling Hills Memorial Chapels naman ang ginamaneho ni Stephen Farrol, 35 anyos, single kag residente sang Purok Paho, Brgy. Estefania, Bacolod City.
Sa interview sang Bombo Radyo Bacolod kay Police Major Karina Onio, Deputy Chief of Police sang Talisay City Police Station, santo sa panaysayon sang witness nga Joel Gargaliano, 40 anyos, kasado kag residente sang Barangay Guinhalaran, ciudad sang Silay, ang motorsiklo kag ang funeral hearse ang pareho nga halin sa ciudad sang Silay kag padulong sa ciudad sang Bacolod, apang nag-overtake ang funeral car rason nga nabungguan sini ang motorsiklo.
Bangud sini nahulog naman sa dalan ang sakay sa motorsiklo kun sa diin nakaangkon sang samad sa ulo kag naglain-lain nga bahin sang lawas sini samtang ang funeral car naman ang nakabunggo sa poste sang kuryente.
Gindala naman sa Talisay City Police Station ang funeral car kag motorsiklo nga imbulbado sa aksidente.
