Duha ka lalaki ang pilason kag duha naman ang arestado matapos ang pagpangluthang sa Sitio Tumakip, Barangay Camandag, La Castellana, pasado alas 2:00 ang takna sang kaagahon, Oktubre 26.
Sa interview sang Bombo Radyo Bacolod kay Police Captain Jose Michael Muñez, Deputy chief of Police sang La Castellanan Municipal Police Station, kahapon sang kaagahon may nagreport nga tatlo ka persona nga ginkasahan sang armas-luthang sang suspetsado kag ginpangtiro apang wala naigo.
Ginkilala ang nagreklamo nga sanday Roberto Gonzales, 23-anyos, Barnito Legaspi , 27-anyos, Rofenger Rodrigaso kag Alfredo Camoral, 56-anyos lunsay residente sang Barangay. Camandag, La Castellana, Negros Occidental.
Suno kay Munez ang suspek ang madamo sang ayo nga ginatawag sa iya kaangay sang Delio kag Nonoy.
Ang reklamo ang ginrespondehan man sang mga kapulisan kag gin-arestado ang isa sa mga nagpaniro matapos nga gintumod sang isa sa mga complainant.
Dugang pa sini nga may isa pa sila nga gin-aresto matapos nga nakita sang mga kapulisan nga may dala nga calibre 45 pistol.
Ang duha ka mga naaresto ang ginkilala nga sanday Rehney,44-anyos kag alyas Lenard, 29-anyos lunsay pumuluyo sang Brgy.Manghanoy, La Castellana.
Samtang pabalik na ang mga kapulisan sa police station hinali naman nga nabatian nga may naglupok sa 10 metros ang kalayoon halin sa ila nahamtangan.
Bangud sa paglinupok, may duha ka napilasa ang isa ang nasamaran sa abaga kag ang isa sa tiil.
Nadala naman ang duha ka napilasan sa rural health clinic sang banwa.
Wala pa matumod ang duha ka persona nga nagpalupok nga nagresulta sa pagkapilas sang duha ka persona apang may yara na sila sang person of interest.
Sa karun nagapadayon pa ang imbestigasyon sang La Castellana Police Station sa nasambit nga insidente.
