Duha sa 15 ka mga high school students nga ginpangtiro sa sulod sang buluthuan sa Tacloban City sang Lunes ang yara subong sa kritikal nga kondisyon, sa diin ang isa ang may igo sa ulo samtang ang isa ang may igo sa tiyan.
Ginkilala ang mga biktima nga sanday Joan Vinias, Grade 10 student, kag amo ang naigo sa ulo, samtang si Nathan Candelario naman, Grade 9 student, ang naiguan sa tiyan kag tinai.
Suno sa iloy ni Joan, indi tani magsulod sa klase ang bata sini bangud nagalain ang pamatyag apang nagdesisyon nga indi na lamang mag-absent bangud may yara sila sang school report sadto nga adlaw.
Samtang, ginpahayag naman sang amay ni Nathan nga posible mangin mahinay ang recovery sang iya bata bangud sa patal nga igo sa iya kasudlan sa diin may tatlo ka buslot ang tinai sang bata.
Nagapanawagan naman sang hustisya ang duha ka nasambit nga ginikanan kag nagpahayag nga luyag nila makit-an nga mapriso gid ang mga suspek kasubong man sang ila mga ginikanan.
