Arestado na ang duha sa anom ka mga suspetsado sa pag hold-up sa job order worker sang banwa sang La Castellana kag mga kaupod sini nga sakay sang isa ka Toyota Innova sa Sitio Lapak, Barangay Robles kahapon sang aga.
Sa interview sang Bombo Radyo Bacolod kay Police Staff Sergeant Andronico Tribaco, Investigator on case sang La Castellana Municipal Police Station, matapos ang nabaton nila nga tawag nagikan sa concerned citizen agud magreport nga may nagluntad nga pagpanghold-up sa Sitio Lapak, Barangay Robles, banwa sang La Castellana, Negros Occidental kahapon sang aga, gilayon man sila nagrespondesa.
Suno kay Tribaco, nadakpan nila ang duha sa mga suspetsado nga ginkilala nga sanday Agosto Tobongbanua Jr., 39-anyos kag Reneboy Abrico, 45, lunsay residente sang Hacienda Wawa, Barangay Pandanon Silos, Murcia.
Agosto Tobongbanua Jr., 39-anyos kag Reneboy Abrico, 45, lunsay residente sang Hacienda Wawa, Barangay Pandanon Silos, Murcia.
Narekober sang mga kapulisan sa duha ang P5,000.00 cash kag nagapadayon ang ila nga imbestigasyon kun ano pa makuha sa crime incident.
Ginpahayag man sini nga santo sa ila nga pagimbestigar sa mga suspek nga ila nadakpan, nasal-an sang mga ini nga ang turko nga ila tinutuyo nga hold-upon ang ginasakyan sang mga biktima bangud pareho ang salakyan.
Padayon nga ginabulong sa ospital ang mga biktima nga sanday Shaem Job Galimba, 34 anyos, samtang ang iloy naman sini amo si Chona Galimba, 60 anyos, nga isa ka retired teacher.
Nakuha man sa crime scene ang pares sang tsinelas, isa ka slug sang .45 calibre pistol, isa ka cartridge shell sang .45, duha ka empty bottles sang mineral water kag echo bag sang retired teacher.
Padayon man ang imbestigasyon sang mga kapulisan sa nasambit nga insidente.
