Nakita na ang duha sa anum ka missing nga foreigner matapos nga mahiking sa Mt Talinis, Valencia, Negros Oriental.
Sa interview sang Bombo Radyo Bacolod kay Police Lt Stephen Polinar, spokesperson sang Negros Oriental Police Provincial Office, nakita na sang mga responders ang duha sa anum ka nadula nga mga foreigners.
Ginkilala ang mga ini nga kanday Alexander Radvanyi kag Torsten Martin Groschupp.
Suno kay Polinar ang apat ang padayon pa nga ginapangita.
Suno diri, naghiking ang anum apang wala nagpahibalo sang mga otoridad nga nagsaka ang mga ini sa nasambit nga bukid tubtob nga nagreport ang mga kahagugma sang mga ini sa kapulisan nga wala pa sila kapauli.
Ginpahayag sang duha nga nagbulagay ang mga ini gani duha lamang ang narescue sa karun.
Samtang ginpahayag naman ni Police Chief Master Seargent Henry Japay sang Valencia Municipal Police Station nga padayon pa ang duha nga ginabulong bangud sa mga bakiras nga naangkon.
Suno kay Japay ang duha ang indi man maestorya gani wala man ang mga ini nakahibalo kun sa diin ang ila nga mga kaupdan ukon ang apat nga wala pa nakita.
Masami man sang mga ini ginahimo ang pagsaka sa nasambit nga bukid apang ini lamang ang una nga tion nga wala sila gilayon nakapauli.
Nagpanugyan man ini sa mga pumuluyo nga magpahibalo gid sa mga otoridad kun magsaka sa bukid agud nga mapaupdan sang guide kag malikawan nga magtalang.
