Arestado sang Murcia Municipal Police Station ang duha sa apat ka mga ginatudlo suspek sa pagpatay kay Barangay Kagawad Joe Arnel Gawan sang Barangay Santa Rosa sa banwa sang Murcia, Negros Occidental.
Ini kasunod sang pagserbe sang warrant of arrest sa mga suspetsado sa idalom sang Manhunt Charlie Operation nga nagresulta sa pagkadakop kay alias “Jo”, 42-anyos, nga ginakabig bilang No. 9 Most Wanted Person sa Regional Level tinalikdan nga Agosto 10, sa Barangay Zone 2 sang nasambit nga banwa.
Sa report sang Police Regional Office Negros Island Region (PRO-NIR), nadakpan man sa separado nga police operation si alias “Angi”, 52-anyos, tinalikdan nga Agosto 11 sa nasambit nga barangay.
Ang duha lunsay mga construction worker kag residente sang Purok Relocation, Barangay Santa Rosa.
Si Gawan ang gintiro-patay sang mga suspetsado sang Enero 26, 2026 sang aga, sa Purok Puncian, Barangay Santa Rosa, Murcia, Negros Occidental kun sa diin nagpanaog ang biktima sa Mitsubishi Highlander matapos nga nagpartisipar sa clean-up drive.
Suno kay PRO-NIR Regional Director PBGen. Cardiño nga dako nga tikang ang pagkadakop sa duha agud makuha ang hustisya para sa pamilya sang Barangay Kagawad.
Ginpahayag man sini nga magapadayon ang pagpangita tubtob sa madakpan ang duha pa ka nabilin nga mga suspek.
