Padayon ang monitoring sang Kabankalan City Police Station may kaangtanan sa apat ka security guard nga tumandok sang Negros Occidental nga nalakip sa gin-release nga wanted poster sang Criminal Investigation and Detective Group (CIDG), kun sa diin duha diri ang may last known address nga Kabankalan City.
Ang duha ka security guard ang ginkilala nga sanday Virgilio P. Bayog, 44 anyos kag Johnry R. Consolacion, 33 anyos.
Sa interview sang Bombo Radyo kay Police Captain Dennis Melgarejo, Deputy Chief sa Kabankalan City Police Station, ila na ginamonitor sa area sang Barangay Oringao si Bayog apang si Vergillo ang indi naman mamonitor sa lugar.
Suno diri, duha ka area ang iga-monitor sang kapulisan nga ginalakipan sang Barangay Oringao kun sa diin nagapuyo ang pamilya ni Bayog kag banwa sang Binalbagan nga ginatiniran sang asawa sini.
Dugang pa ni Melgarejo, nga may yara naman sila sang gina-contact nga informant apang wala pa sila sang may nabaton nga impormasyon tubtob sa karun.
Aminado man ini nga mabudlay kun makig-angot ang kapulisan sa pamilya ni Bayog, sa kahangawa nga ila paandaman si Bayog nga indi magpauli apang ginlantaw man sini nga mahimo wala pa makapauli si Bayog sa nasambitan nga siyudad.
