Duha na ang nakilala gikan sa tatlo ka bangkay nga asod asod nga nasapwan sa Talisay City, Negros Occidental.
Madumduman nga ang una nga nakilal-an nga biktima sa Hacienda San Isidro, Barangay Concepcion, amo si Mars Relles, 48-anyos, residente sang Purok Pedring, Barangay Estefania, Bacolod City.
Sa interview sang Bombo Radyo Bacolod kay Police Lt. Col. Alvin Christopher Baybayan, Chief of Police sang Talisay City Police Station, santo sa nakuha sini nga impormasyon nagikan sa Special Investigation Task Group ang isa pa sa duha ka bangkay sa Barangay Concepcion ang ginkilala kay alyas Koykoy nga residente sang Candoni, Negros Occidental kag isa ka mangunguma apang tumandok sang San Enrique.
Possible magkilalahay si Koykoy kag si Mars Relles nga nasapwan sa magkalapit lamang nga lugar.
Madumduman nga asod-asod nga nasapwan ang mga bangkay sang Agosto 11.
Alas-2:20 sang kaagahon, may nakit-an nga motorsiklo kag helmet sa kilid sang kakampuhan sa Hacienda San Isidro, Barangay Concepcion kag sang gintsekyar didto na nasapwan ang bangkay sang isa ka lalaki.
Alas-9:00 sang aga, nasapwan ang ikaduha nga bangkay nga nagaka-agnas na sa Hacienda Minuluan Mendoza, Barangay Matab-ang kag alas-2:00 sang hapon, may isa pa gid ka bangkay nga nasapwan kalapit lamang sa una nga bangkay.
Sa karun, nagapabilin nga wala sang identity ang nagaka-agnas nga bangkay sa Barangay Matab-ang.
Nagapadayon man ang imbestigasyon sang mga kapulisan agud nga matumod ang motibo sa pagpatay sa mga biktima.
