Nangin magutok ang dalagan sang trapiko subong nga adlaw sa tagsa ka border sang ciudad sang Bacolod bangud sa ginbutang nga control point kadungan sang pagpatuman sang home quarantine pass.
Nahibaluan nga nagbutang sang outer kag inner border points sa syudad sang Bacolod kadungan sang pagpatuman sang mandatory nga paggamit sang home quarantine pass agud malimitahan ang mga nagagwa nga mga residente.
Sa CEGASCO pakadto sa Sum-ag nga border, ginaid-idan sang mga nagabantay ang pagtsekyar sang mga valid ID, barangay clearance kag certificate of employment.
Nahibaluan nga ginpabutangan man sang inner border ang Barangay Singcang kag Barangay Pahanocoy.
Samtang, sa Talisay-Bacolod border naman, nangin tuman kalaba ang pila sang mga salakyan bangud sa maid-id nga pagtsekyar sang enforcers kag pulis agud masiguro nga authorized ang mga nagasulod sa syudad.
Pag-abot sa atubang sang mall sa Barangay Mandalagan, may yara pa gid sang inner border point kun sa diin tuman man kalaba ang pila sang mga salakyan.
