Natingala ang alkalde sa ciudad sang Dumaguete sa Negros Oriental sa desisyon sang Timor Leste government nga ipadeport balik sa Pilipinas si expelled 3rd District Representative Arnolfo “Arnie” Teves Jr.
Sa interview sang Bombo Radyo Bacolod kay Dumaguete City Mayor Felipe Antonio Remollo, wala sini nahibaluan ang layi sa Timor Leste, gani dapat nga ipaathag ang proseso.
Pahanumdom sang alkalde nga una na nga gingrant sang korte sa Timor Leste ang political assylum para kay Teves.
Bilang isa man ka abogado, gin-athag ni Remollo nga sa Pilipinas, ginatahod sang executive department ang desisyon sang korte.
Nagapati ini nga may internal conflict sa nasambitan nga pungsod gani nagsampok ang desisyon sang korte kag sang Timor Leste government.
Madumduman nga ginkanselar na passport ni Teves matapos nga ini ang madeklarar nga terorista sang siya ang gintudlo nga mastermind sa pagpatay kay late Negros Oriental Governor Roel Degamo kag siyam ka iban pa.
Apang paathag ni Remollo nga mahimo madeny ang pagsulod sa isa ka pungsod sang kanselado ang passport kun ini ang yara sa airport, apang ini ang indi aplikable kay Teves bangod magluwas nga siya ang yara na sa Timor Leste, gingrant pa sang korte ang iya political assylum.
Ginalantaw sang alkalde nga mahimo nakita sang Presidente sang Timor Leste nga makatuga sang problema sa ila kun maglawig ang anay kongresista bangod mahimo nga maguba ang ila pangalan sa iban nga kapungsuran.
Ilabi na nga bag-o lamang natapos ang Association of Southeast Asian Nation (ASEAN), kun sa diin mahimo nadiskusyunan man ang isyu.
Suno kay Remollo, mahimo nga ginakahangaw-an sang Presidente nga matag ang Timor Leste nga palanaguan sang mga kriminal kag mga nagapalagyo sa justice system sang ila tagsa ka pungsod.
Bilang abogado, suhestyon sini nga mas maayo nga atubangon ni Teves ang kaso sa Pilipinas kag pamatud-an kun ini gid man ang inosente.
