Nakibot ang driver sang dump truck kag yara sa karun sa ospital matapos mahighblood, sang siya ang hinali gindala sa Hall of Justice kagab-i agud pasakaan sang kaso sang aksidente nga nabungguan nga retired PNP general, apisar nga may-ara na sang initial settlement.
Sa interview sang Bombo Radyo Bacolod kay Romer Estrada, 51 anyos, ang insidente ang natabo sa Barangay Mansilingan, sa crossing padulong sa Land Transportation Office pasado alas-11:30 kahapon sang udto.
Suno diri, siya ang halin sa Barangay Alangilan kag padulong sa Barangay Sum-ag samtang parehas man sila sang lane ni retired Police Brig Gen Lope Ma U Lim nga nagadala sang big bike.
Si Lim, ang ulihi nga nagserbe sa Sorogon bilang Regional Internal Affairs Office 5 Director.
Panaysayon ni Estrada nga una na nakalabay ang pila ka mga riders sini nga kaupdanan, kag bangod siya ang magaliko, nagpundo kag ginhulat nga makalabay ang wing van nga gikan sa pihak nga dereksyon.
Nakita pa sini sa side mirror nga nagdulog man ang nagasunod sa iya nga pick up kag motorsiklo.
Apang sang siya ang magaliko na, hinali nga naglusot ang retired PNP general nga yara na sa opposite lane gani nagbunggo piyertahan sa driver side sang dump truck.
Natumba si Lim, kag gilayon man nga ginbuligan sang mga kaupdanan sini nga rider, samtang si Estrada ang nagpanaog man agud tsekyaron ang biktima.
Wala man sang samad ang retirado nga pulis, apang naka-angkon sang damage ang ubox sang big bike.
Nagtawag ang mga ini sang pulis, kun sa diin si Lim lamang ang gin-atinder samtang ginpabay-an ang truck driver.
Ginatindugan sang retired PNP general nga siya ang may siren, apang suno kay Estrada, nabatian sini kuntani kun may-ara sang siren.
Suno kay Estrada, pagdangat sa Bacolod Police Station 7, nag-apas man ang iya boss kag abogado sang kompanya.
Gintinguhaan pa sang kapulisan nga mahusay kag may-ara naman sang initial settlement, apang siya ang wala ginbuy-an bangod kinahanglan tapuson ang 12 oras nga reglementary period.
Sang gab-i, nakibot nalang sila nga ini ang ginderetso sa Hall of Justice kag ginpasakaan sang kaso.
Bisan ini ang natingala nga bukas pa ang Hall of Justice pasado alas-11:30 sang gab-i kag yara pa ang piskal para mag-asikaso.
Siya ang ginpasakaan sang kaso nga “Reckless Imprudence Resulting to Physical Injury and Damage to Property.”
Bangod sa kakulba, ginhighblood si Estrada kag siya ang gindala sang iya mga kaupdanan sa ospital.
Halos wala man sang paki-alam sa iya ang pihak nga kampo, sa baylo ginpaupdan pa ini sang duha ka pulis agud magwardiyahan samtang yara sa ospital.
