Pormal na nga naturn-over kahapon ang duplicator machine sa ciudad sang Bacolod kadungan sang mga generating sets.
Suno kay Executive Assistant to the Mayor Moises Dela Cruz, nagligad nga mga inadlaw pa nga nadeliver ang duplicator machine kag nagamit na apang kahapon lang pormal nga ginturn-over.
Samtang ginkumpirmar naman ni Dela Cruz nga may nagdaog na sa bidding process para sa isa ka libo nga tablet kag 86 ka mga laptop kag ginahulat nalang ang mga ini nga madeliver.
Ang isa ka libo nga tablet ang igapanghatag sa mga junior kag senior high school student samtang ang 86 naman ka i7 laptop ang igahatag sa mga manunudlo.
Na-identify naman ang mga persona nga makabatun sang mga gadgets nga ginapaabot sang ciudad.
Ang mga ini ang natalana nga ihatag sa mga estudyante nga yara sa special science class apang pagapilion naman ang hatagan bangod nakita nga pila sa mga ini ang nagapanag-iya na sang gadget.
Paathag naman ni Dela Cruz nga indi igahatag ang mga gadgets sa mga estudyante kundi pahulam lamang, bangod pagabawion ini sa katapusan sang school year.
Ginabanta naman nga malapit na mag-abot ang supply bangod 21 na ka adlaw ang nakaligad sang natapos ang bidding kag natalana ang delivery sa sulod sang 31 ka adlaw.
Samtang ang nabaton naman sang ciudad nga duplicator machine nga nagabalor P3 million, ang kaangay sa risograph apang colored ini kag madamo sang mahimu.
Suno kay Dela Cruz, ang output nagikan sa duplicator ang napasunod na sa pages kag nakastaple na.
Sarang ini nga makahuman sang 120 ka mga kopya sa kadaminuto.
Samtang, isa lang ang duplicator nga ginkuha sang ciudad, kag natalana naman nga magpadala sang 10 ka mga risograph machine para sa nagkalainlain nga distrito sa probinsya.
P125 million naman ang kabug-usan nga nagastos sang ciudad sa mga gadgets kasubong man sa 150,000 nga reams sang A4 nga bond paper kaupod na ang ink.
