Aminado si Atty Jomax Ortiz nga tuman ka kontrobersyal ang isyu tuhoy sa Bacolod Old City Hall.
Madumduman nga madamo sang nag-ibwal matapos gindemolish ang establishimento para sa tuyo nga rennovation.
Sa interview sang Bombo Radyo Bacolod kay Ortiz, kliyente sini ang apo ni late Jose Ruiz D. Luzuriaga, nga amo ang nagdonar sang duta nga gintukuran sang Old City Hall.
Pahayag sini nga sa Huwebes mapatigayon na sila sang final hearing sa Regional Trial Court Branch 50 angot sa ginfile nga annulment sang land title nga ginakapyotan sang ciudad.
Paathag sini nga sa kaso, wala pa nalakip ang ginhimo nga total demolition sa propidad.
Suno diri antes ang pagdemolish sa mga propedad nga may historical value, kinahanglan pa sang approval gikan sa historical commission.
Apang ang ila nga ginapakigbato sa Regional Trial Court amo ang natuhoy sa titulo sang duta apisar nga ini ang donasyon lamang.
Dugang pa sini nga konsehal siya sadto sang ginhatag ang deed of donation sadtong 1988.
Suno kay Ortiz, natingala ang iya nga kliyente kun paano nakakuha sang reconstituted title ang Bacolod City Government.
Paathag sang abogado nga ang reconstituted title, ang ginahatag kun madula ang original title kinahanglan nga magfile sang petisyon kag maggamit ang kopya gikan sa registry of deeds.
Apang bangod nadula ang kopya sa registry of deeds, kinahanglan ang owner’s copy sang titulo.
Gani kwestyon para sa iya kun paano nahatagan sang reconstituted title ang Bacolod City Government ilabi na nga yara sa iya kliyente ang owner’s copy.
Paathag sini nga lalantawon pa kun ginbayolar sang ciudad ang kaundan sang deed of donation nga nagapahayag nga ang duta ang tukoran sang Mayor’s Office kag opisina sang Sangguniang Panlungsod.
Apang sa karun, yara na sa Bacolod City Government Center ang nasambitan nga mga opisina kag minor offices na lamang ang nabilin sa Old City Hall.
Gani luyag na lamang sang Luzuriaga Family nga bawion ang propidad.
