BACOLOD CITY – Masobra P500, 000 ang bulig nga gindaho ni Presidente Rodrigo Duterte sa tagsa ka pamilya sang mga pulis na napatay sa nagluntad nga ambush sa Guihulngan City sadtong Biyernes sang aga.
Ini ang kadungan sang pagbisita ni Duterte sa Guihulngan City Hall kagab-i kun sa diin nakahamyang ang bangkay sang apat ka mga pulis gikan sa kabug-usan nga anom ka miyembro sang Guihulngan City Police Station nga napatay sa ambush.
Apang bisan wala ang bangkay sang duha ka iban pa, yara man gihapon sa City Hall ang ila nga misis kag iban pa nga miyembro sang pamilya.
Bisan madasig lang, napuno sang emosyon ang pag pakig-istorya sang presidente sa misis kag mga himata sang mga pulis.
Kadungan sang Medalya ng Kadakilaan nga ginhatag ni Duterte sa pamilya, ang cheke kag cellphone.
Sa pagpamangkot sang reporter sang Bombo Radyo, ginpahayag sang presidente nga gin hatag sini ang P250, 000 nga cheke kag P20, 000 nga cash.
Magluwas diri , may batunon pa ang mga ini nga P250, 000 gikan sa personal nga kwarta sang punong ehekutibo nga mahimo gamiton sa pagtuon sang mga bata kag livelihood sang nailo nga pamilya.
Suno kay Duterte, mahimo magpabulig sa Department of Trade and Industry para sa small and medium enterprises ang asawa sang mga pulis agud may palangitan-an ang mga ini.
Magluwas sa presidente, naghatag man sang bulig si PNP Chief Police Director General Ronald ‘Bato’ dela Rosa sa balo sang mga pulis apang wala na ginpahibalo ang balor sini.
Las 5:30 sang hapon sang nag-abot sa Dumaguete–Sibulan Airport ang presidential plane nga ginsakyan sang presidente.
Kalakip sa mga nag sugat sa iya sanday dela Rosa, PRO 18 Director Police Chief Supt. Edmund Gonzales, 3rd Infantry Spearhead Division commander Major General Jon Aying kag NORPPO Director Police Senior Supt. Henry Biñas.
Las 6:20 sang gabi, nag-abot si Duterte sa Guihulngan City Hall kag pasado las 7:30, nagbiya ini padulong sa Silliman University Medical Center sa Dumaguete City agud bisitahon ang tatlo ka mga pulis nga napilasan sa ambush.