Dungan nga naglunsyar sang tagsa-tagsa nga pagtililipon sa gwa sang International Criminal Court (ICC) ang mga himata sang mga biktima sang war on drugs kag mga supporters ni anay President Rodrigo Duterte.
Ginpatigayon ang magkatuhay nga aktibidad kahapon, Lunes, kadungan sang pag-umpisa sang confirmation of charges hearings sang pre-trial chamber sang ICC laban sa anay presidente.
Sa pihak sang tuman ka tugnaw, nagmartsa padulong sa korte kag naglunsyar sang programa ang mga pamilya sang mga biktima samtang nagbantay sa livestream sa hearing.
Panawagan sang mga ini nga kumpirmahon ang mga kaso kag pasabton si Duterte kalakip na ang iban pa nga imbulbado sa gina-alegar nga extrajudicial killings sa idalom sang iya nga administrasyon.
Sa pihak nga bahin, nagpatigayon man sang kaugalingon nga programa ang supporters sang anay presidente nga nakakuha sang nagakaigo nga permit.
Ginbitbit ang isa ka standee ni Former President Duterte, gin-athag sang mga ini nga indi ini isa ka protesta kundi pagpakita sang suporta.
Nagalaom ang grupo nga ibasura sang ICC ang mga akusasyon.
