Ginkompirmar sang station commander sang Bacolod Police Station 9 nga nakagwa na sa prisuhan ang duty jailer nga nagabantay sang nakapalagyo ang isa ka inmate sang Enero 17 sang aga.
Madumduman nga nagpalagyo ang inmate nga si Gabriel Liboon, 29-anyos sang Purok Nami-nami 1, Brgy. Sum-ag sa Bacolod Police Station 9 sang Enero 17 sang aga.
Ini matapos nga iya ginlukit ang kandado sang selda gamit ang lock pick.
Si Liboon ang naaresto sang Enero 8, 2020, lamang sa kaso nga paglapas sa RA 9165 kasunod sang buybust operation batok sa iya.
Sa interview sang Bombo Radyo kay Police Lt. Jovito Pastrana, ginkompirmar sini nga temporaryo nga hilway ang duty jailer nga si Police Staff Sergeant Jose Miguel Rogacion nga ginreklamo sang infidelity in the Custody of Prisoner matapos makapyansa.
Suno kay Pastrana, nakabalik naman sa duty si Rogacion apang sabton niya gihapon ang kaso nga ginpasaka batok sa iya.
Suno sa station commander, ginpanugyanan niya ang jailer kag nag-ako man ini sang iya nga kakulangan kag nangayo sang kapatawaran sa iya kapabayaan.
Nahibaluan nga nagbakal sang sud-an si Rogacion sang matabo ang pagpalagyo sang inmate.
