Ginalantaw nga bwas pa mapasaka ang kaso batok sa 57 anyos nga e-bike driver nga nagpangawat sang anom ka tray sang itlog sa Burgos Public Market kahapon alas-9:00 sang aga.
Suno kay Elisa Catacata, 54 anyos, yara lang sa idalum nga bahin sang ila nga tindihan ang mga itlog sang ini ang ginkuha sang suspetsado nga ginkilala nga si Cloves Elbanbuena, 57 anyos.
Apang pagbalik sini matapos nga magkaon nadula na ang mga itlog gani kag wala man nakatalupangod ang iban sini nga kaupod.
Sang gintsekyar sa CCTV footage sang kaingod nga tindahan, didto na kag nakilala ang suspetsado.
Suno diri, lima lang ka tray ang ginreport sini sa Bacolod Police Station 4 sang nagpablotter kag ulihi na sini nahibaluan nga lima ka tray ang gintaban sang suspetsado.
Nahimo naman nga madakop ang suspetsado sang hapon apang ini ang indi pa mapriso bangod naglapse na ang reglimentary period.
Nagluhod naman ang suspetsado sa atubang sang market vendor matapos madakpan, kag suno kay Catacata nag ayo ini nga indi siya prisuhon bangod tuman na ini ka niwang kag indi ini makaagwanta sa prisuhan.
Pahayag sang biktima nga hingyo lang sini nga ibalik sang suspetsado ang itlog ukon bayaran apang ginapahayag ni Elbanbuena nga nahatag na sini ang mga itlog sa iya nga kilala kag siya ang ginbayaran lang sang P150.
Nahibaluan nga ginabaligya sang market vendor ang kada tray sang itlog sa P225 kun sa diin ini ang iya ginabayaran sa delivery kada adlaw.
Panawagan naman ni Catacata sa himata sang suspetsado nga ini ang hambalan nga indi na magpangawat sang ila nga makaon.
Suno diri, ang suspetsado ang nagpangawat man sa merkado sang mantika sang nakaligad kun sa diin sang gindala sa Bacolod Police Station 4, may nagdangop man kag nagreklamo nga ginkawatan man sini sang plastic nga bangko.
Sa interview sang Bombo Radyo kay Cloves Elbanbuena, kapigaduhon ang nagtulod sa iya agud nga mangawat.
Suno diri, indi mag-igo ang iya income sa pagbyahe sang e-bike gani napilitan ini nga mangawat.
Ang anom ka tray sang itlog ang ginbaligya ni Elbanbuena sang tag-P100 apang indi niya kilala ang nagbakal.
Suno diri, ginbakal niya sang pagkaon ang bili sang itlog.
Aminado ini nga makaluluoy man si Catacata apang nagpangayo na ini sang pasaylo kag nagalaom nga indi na magpasaka sang kaso ang iya ginkawatan.
Suno kay Elbanbuena, nagalaom ini nga mapatawad siya ni Catacata kag indi na magpasaka sang kaso.
