Patay ang 53 anyos nga e-bike driver matapos nga ginluthang sang motorcycle-riding suspects sa Buenavista Subdivision, Brgy Guinhalaran, ciudad sang Silay, Negros Occidental, kaina sang aga.
Ang biktima ang ginkilala nga si Domingo Superficial nga residente sang nasambit nga lugar.
Sa interview sang Bombo Radyo kay Police Lt. Col. Mark Anthony Darroca, hepe sang Silay City Police Station, nagapungko sa ebike si Superficial sa atubang sang iya balay sang may nag-abot nga duha ka persona nga nagasakay sa motorisklo.
Gilayon nga ginluthang sang suspek si Superficial kun sa diin nag-agom ini sang igo sa ulo nga gintunaan sang kamatayon sini.
Pahayag ni Darroca, santo sa statement sang pamilya, may nakontra si Superficial sang nakaligad kag sa karun ginalantaw nga motibo amo ang personal grudge.
