Madinalag-on nga napatigayon ang Earth Hour sa bilog nga kalibutan kagab-i nga tema subong nga tuig nga Shape Our Future.
Apisar nga indi gid tuman ka damo ang nakigbahin sa aktibidad sa Bacolod City ilabi na nga nagapatigayon sang dungan nga political campaign ang Grupo Progreso kag Team Asenso, ang Earth Hour ang madinalag-on naman nga gin-obserbar sa iban nga bahin sang Pilipinas kasubong man sa kalibutan.
Sa interview sang Bombo Radyo kay Errol Gatumbato, isa ka environmentalist/conservationist magluwas sa pag-edukar sa mga pumuluyo angot sa pag-amlig sang environment, dako nga volume sang produktong petrolyo ang makinot bangud kalabanan nga power plant ang ginapadalagan sang diesel.
Suno kay Gatumbato, ginpahayag sang mga eksperto nga dako ang kontribusyon sang diesel-power plant sa climate change.
Bangud sini, ginaengganyo ang tanan nga makigbahin sa global movement agud salbaron ang planeta nga Earth.
Ginaadvocate man sang Earth Hour nga magtipid sang kuryente paagi sa pagturn-off sang mga appliances nga wala ginagamit.
Ginaengganyo man ang mga nagapanag-iya sang salakyan nga iminimize ang paggamit sang salakyan agud maminimize man ang emission sang carbon monoxide sa palibot nga nagacontribute sa global warming.
Suno sa environmentalist, tuman kainit ang panahon sa karon bangud nabuslot na ang ozone layer kag indi na ini marepair.
Bangud sa climate change suno sa iya, nagaluntad ang extreme weather conditions kaangay sang tuman kakusog nga bagyo kun sa diin nagasaylo-saylo ang ginahalinan sini kag ginabaha naman ang mga lugar nga wala ginabaha sadto.
Nagaluntad man ang La Nina kag El Nino kun sa diin apektado ang pananom bangud nagakalaya ang tanom kun nagaluntad ang El Nino.
Bangud sa tuman nga kainit, nagakatunaw man ang minilyon ka ektariya nga ice sa Atlantic gani nagasaka ang saltwater, nagalugdang ang mga isla kag nagaluntad ang intrusion sang tubig-maalat sa groundwater.
