Ginahingyo ang publiko nga indi pagbalewalaon ang mga earthquake drill nga ginapatigayon, kag himuon ini nga seryoso nga preparasyon para sa posible nga linog.
Sa interview sang Bombo Radyo Bacolod kay Dr. Anna Maria Laarni Pornan, head sang Bacolod City Disaster Risk Reduction and Management Office (DRRMO), importante nga magpartisipar ang tanan sa simultaneous earthquake drills agud mahibaluan ang nagakaigo nga tikang sa tion sang emerhensya.
Gina-agda sini ang mga opisina, buluthuan kag iban pa nga mga establisemento nga aktibo nga mag-upod sa mga drills bangud amo lamang ini ang kahigayunan nga makapraktis antes matabo ang matuod-tuod gid nga kalamidad.
Ginpahayag ni Pornan nga importante ang pagpreparar sang personal nga go bag nga ginalakipan sang mga importante nga butang kaangay sang emergency kit, bulong, importante nga mga dokumento, pito kag flashlight, agud indi mabudlayan pananglitan guba man ang evacuation center ukon samtang nagahulat sang rescue.
