Magafile sang counter charges ang alkalde sa banwa sang EB Magalona batok kay former Vice Mayor Rob Acaling nga nagfile sang kaso batok sa ila apang gindismiss sang Office of the Ombudsman.
Ini angot sa ginfile ni Acaling nga kaso sang 2017 nga Republic Act 3019 ukon Illegal Use of Public Funds or Property kag Republic Act 6713 ukon dishonesty, grave abuse of authority kag grave misconduct batok kanday EB Magalona Mayor Marvin Malacon kag nanday former Councilor kag current Vice Mayor Eric Matulac, Sangguniang Bayan Members Joey Pugales, Reylan Gamboa Sr, Isidro Gomed Jr., Gelita Parcon, kag Jovie Madayag, kasubong man kay Tanza barangay captain Leah Beri.
Akusasyon ni Acaling nga may konspirasiya kun sa diin nag-endorso ang mga konsehal sang resolusyon nga nagahatag gahom sa alkalde nga magpirma sang memorandum of agreement, apisar wala naglabay sa nagakaigo nga deliberasyon ukon diskusyon.
Dugang pa sini nga nagpagwa sang pondo ang mga akosado, paagi sa financial assistance sa 23 ka Barangay kalakip na ang Barangay Tanza, nga wala sang nagakaigo nga ordinansa.
Apang ang kaso ang gindismiss bangod sa kakulang sang napresentar nga ebidensya.
Una naman nga ginwithdraw ni Acaling ang iya nga complaint sang Oktobre 2018, apang ang affidavit of desistance sini ang wala ginbatun sang Office of the Ombudsman tubtob nga ginbasura ang kaso tinalikdan nga adlaw.
Suno kay Malacon, ini ang nagapangayo pa sang abiso sa abogado kun ano gid ang nagakadapat nga kaso.
Aminado ini nga natamad naman siya nga magfile sang counter charges apang nakita sini nga kun indi himuan sang tikang, padayunon lang ang lihok sa mga madason pa nga magapungko sa pwesto.
Ini ang ginalantaw ni Malacon nga pamulitika kun sa diin madamo na sang naapektuhan.
May-ara man sang kaangay nga napasakaan sang kaso ni Acaling nga wala naka-enjoy sang nagakadapat nga benepisyo sa ila retirement.
Agud mahatagan sang hustisya kag indi na maliwat ang kaangay nga buluhaton, panindugan sang alkalde nga siya ang magafile sang kaso, may eleksyon man ukon wala.
