Nagtuga sang kabudlayan sa mga pedestrians kag estudyante ang nakapark nga ebike sa covered walkway sa Bacolod City National High School.
Sa interview sang Bombo Radyo Bacolod kay Bacolod Traffic Authority Office (BTAO) Deputy Chief Jose Antonio ‘Jojo’ Robello, ginmanduan na sini ang mga traffic enforcers malapit sa area nga sawayon kag pahalinon ang mga ebike nga nakapark sa walkway kag kun liwat ini nga matabo, iga-tow ang mga ebike.
Suno diri, ang walkway ang para sa mga estudyante sang buluthuan kag sa mga pedestrians kag indi para sa mga vehicles.
Bangod sa mga vehicles sa walkway, nagapanaog sa dalan ang mga pedestrians kag ini ang dilikado samtang kun naga-inulan naman, imbes nga indi mabasa ang mga estudyante, sila ang nagakabasa bangod nga indi sila kalabay sa covered walkway.
Pahayag ni Robello, maka-extend ang BTAO sang konsiderasyon ilabi na kun naga-inulan nga mahimo lamang makapark sa kilid sang dalan kag makapananaog ang driver kag magpasilong apang ini naman ang makatuga sang obstruction sa dalan ilabi na kun national highways kun sa diin ginadumilian ang pagpark sa kilid sang dalan.
