Gindeklarar sang World Health Organization (WHO) ang Ebola outbreak sa Democratic Republic of Congo (DR Congo) bilang public health emergency of international concern bangud sa posible nga paglapta sini sa iban nga pungsod.
Santo sa WHO, ang outbreak ang yara sa nasidlangan nga bahin sang DR Congo, nga may ginabulubanta nga 246 ka suspected cases kag 80 ka mga ginbawian sang kabuhi.
May yara na sang walo ka kumpirmado nga kaso sang Ebola, kalakip ang isa sa kapital sini nga Kinshasa, kag iban pa sa pila ka health zones kaangay sang Bunia, Mongwalu, kag Rwampara.
Nahibaluan nga ang virus ang naggikan sa Bundibugyo strain sang Ebola, nga wala pa sang aprubado nga bakuna ukon bulong.
Ang mga sintomas sini amo ang hilanat, palanakit sang lawas, pagpangluya, pagsuka-suka, diarrhea, kag bleeding sa mga malala nga kaso sini.
Ginkumpirmar man sang WHO nga may mga kaso na sa kalapit nga pungsod Uganda, kalakip ang isa ka 59-anyos nga lalaki nga nagtaliwan matapos malatnan sang virus.
May yara man sang mga report sa Goma, isa kag ciudad sa nasidlangan nga bahin sang DR Congo nga kontrolado sang mga rebelde.
Nagpaandam ang WHO nga mahimo maglala pa ang sitwasyon bangud sa tensyon sa rehiyon, sa kadamo sang populasyon, kag kakulangan sang maayo nga health facilities.
Gin-abisohan man sini ang mga apektado nga pungsod nga magpatindug sang emergency response centers, mas hugot nga pag-monitor, kag gilayon nga isolation sang mga kaso.
