Aminado ang economic team sang administrasyon ni President Ferdinand “Bong bong” Marcos Jr. nga hugot nila nga ginabantayan ang posible nga epekto sa Pilipinas sang kontrobersyal nga new global trade policies sang Estados Unidos.
Suno kay National Economic and Development Authority (NEDA) Secretary Arsenio Balisacan, hugot sang mga ini nga ginabantayan ang mga taripa nga ginapatuman sang Estados Unidos kag ang pagbalos sang pila ka mga pungsod.
Sa pihak sini, nagapati ang opisyal nga mas dako ang epekto sa kaiping nga pungsod kun ikumparar sa Pilipinas.
Bangud sini, ginalantaw sang gobyerno nga mas pasanyugon pa ang investments kag ang performance sa pag-export kaupod ang iban nga mga pungsod.
Gintumod ni Secretary Balisacan ang mga oportunidad sa Middle East, ilabi na sa agricultural exports gikan sa Mindanao.
Kalakip ang potensyal sang India bilang isa ka growing market.
Gintawag ini sang pinuno sang NEDA nga “future-proofing” agud mapabaskog ang ekonomiya sang pungsod batuk sa economic shocks kag geopolitical tensions.
