Nagpanindugan ang economics professor sa ciudad sang Bacolod nga indi patas para sa isa ka administrasyon nga siya lang ang basulon sa wala nasolbar nga kapigaduhon sang mga Pilipino.
Sa interview sang Bombo Radyo kay Professor Jean Lee Patindol, aminado ini nga mabakod ang economic legacy ni anay Presidente Noynoy Aquino III.
Sa tion sang Aquino administration suno kay Patindol, nasuguran na ang ideal nga classic economic situation nga high growth sang gross domestic product, manubo ang presyo sang mga balaklon kag manubo ang unemployment bisan mabudlay ini nga himuon sang dungan.
Ang kapigaduhon suno sa professor ang 60 na ka tuig nga problema sang Pilipinas gani indi mangin patas para sa isa lang ka administrasyon nga mamukmokan ini sang basol sa nagapadayon nga poverty.
Ang pinakamaayo nga himuon sang gobyerno amo ang pagdihon sang policy kag environment nga makakas ang economic structure nga nagaupang sa mga tawo nga mag-asenso.
Suno kay Patindol, indi mahimo sang gobyerno ang anti-poverty programs kun indi makigbahin ang pribado nga sektor kaangay sang mga negosyante kag ang mga pumuluyo.
Sang tion ni Aquino, nasuguran suno sa ekonomista ang mga tikang para sa economic growth bangud nasuguran ang mga policies kag environment framework agud maengganyo ang pribado nga sektor nga makigbahin agud mag-uswag ang ekonomiya.
Nagboom man ang middle class tubtub upperclass industries kaangay sang banking and finance, salakyan, BPOs, kag real estate nga nagtrigger sang kompetisyon nga nagresulta sa pagnubo sang presyo sang balaklon kag serbisyo.
Suno kay Patindol, ang pagsolbar sang kapidugaduhon ang nagakinahanglan sang long-term perspective kag structural reforms nga commitment sang tanan nga presidente.
Sa idalom sang Aquino administration, gin-expand man ang Pantawid Pamilyang Pilipino Program kun sa diin malapit 20 million ang mga benepisyaryo.
Suno kay Patindol, may domino effect ang 4Ps bangud may ikasarang ang mga pamilya nga magbakal sang kinahanglanon nga nangin oportunidad sa iban nga sektor nga maka-income.
