Ed Sheeran, nag-upod sa ulihi nga bahin sang Eras Tour European leg sang iya bestfriend nga si Taylor Swift

Gin-updan sang British singer nga si Ed Sheeran ang iya “best friend” nga si Taylor Swift sa ulihi nga parte sang iya Eras Tour European leg sa Wembley Stadium sa London.

Nangin perfect ang mash-up performance sang duha ka superstars sa duha ka kanta nga magkaupod nila nga ginhimo, ang 2012 hit nga Everything Has Changed kag 2017 collaboration nga End Game samtang ginalantaw sang 92,000 fans.

Gin-updan man ni Swift ang pagkanta sang mega-ballad ni Sheeran nga Thinking Out Loud.

Ang nasambit nga concert ang una nga performance sang 34-anyos nga American music icon matapos ginkanselar ang iya tatlo ka shows sa Vienna sang tinalikdan nga semana bangud sa gin-alegar planado nga terror attack sa Austria.