Indi limitasyon ang edad para indi magpadayon sa pag-eskwela ang pahayag sang 59 anyos nga Alternative Learning System (ALS) Graduate.
Sa interview sang Bombo Radyo kay Emelita Guanzon Cervantes, tubtob sa karun buhi sa gihapon ang iya nga handum nga makatapos sa pag-eskwela.
Suno diri, wala ini nakatapos sa high school sadto bangod sa kapigaduhon kag timprano pa ini nga namana kag nagkapamilya.
Apang, sa karun nga nakatapos na ang mga kabataan sini sa pag-eskwela, nagdesisyon ini nga magbalik sa eskwelahan.
Gindungan sini ang pagtrabaho kag pag-eskwela nga indi man mahapos para sa iya bangod man nga may edad na ini.
Apang, nagtinguha ini kag nagpabulig sa iya mga kabataan tubtob nga sa karun nakagradwar na ini sa high school.
Dugang pa sini, sa ila lima ka mag-ululutod, siya pa gid lamang ang nakagradwar sa high school kag gin-ingganyo ang iya utod nga magpa-enroll man kag mag-eskwela sa masunod nga school year.
Sa karun, plano sini nga magpadayon sa Senior High School kag College.
Panugyan sini, amo nga indi upang ang edad sa pag-eskwela kag ang edukasyon ang madala gid tubtob sa katigulangon.
